Më 10–11 qershor 2025, përfaqësues të Agjencisë Kombëtare të Kontrollit të Cannabis-it (AKKC) dhe Universitetit Bujqësor të Tiranës, morën pjesë në takimin vjetor të organizuar nga Shoqata e Rregullatorëve të Cannabis-it në SHBA (CANNRA), zhvilluar në Denver, Colorado.
Ky event mblodhi mbi 130 përfaqësues nga agjencitë rregullatore, autoritetet shtetërore dhe federale nga mbi 30 shtete dhe territore të SHBA-së, si dhe pjesëmarrës ndërkombëtarë. Në qendër të diskutimeve ishin sfidat dhe përparësitë e përbashkëta për garantimin e një kuadri të qëndrueshëm dhe të sigurt rregullator për produktet e cannabis-it.
Temat kyçe përfshinë:
- Parandalimin e devijimeve të paligjshme dhe garantimin e integritetit të produktit;
- Harmonizimin e standardeve për eksport dhe përputhshmërisë ndërmjet shteteve;
- Qasjet rregullatore për produktet me përmbajtje të lartë THC dhe format e reja të produktit;
- Politikat për përdorim mjekësor dhe industrial të cannabis-it;
- Qëndrueshmërinë e zinxhirit të furnizimit dhe reagimin ndaj fatkeqësive natyrore;
- Tendencat ekonomike dhe të dhënat e tregut.
Përfaqësuesit e AKKC patën mundësinë të shkëmbejnë përvoja me homologë nga juridiksione të ndryshme dhe të ndërtojnë kontakte të rëndësishme për bashkëpunime të ardhshme. Ky angazhim kontribuon drejtpërdrejt në zhvillimin e politikave të informuara dhe në përafrimin e kuadrit rregullator shqiptar me praktikat më të mira ndërkombëtare.
