Përfaqësues të Agjencisë Kombëtare të Kontrollit të Cannabis-it (AKKC) morën pjesë në konferencën ndërkombëtare “Cannabis Europa London 2025”, e mbajtur në datat 24 dhe 25 qershor 2025, në Barbican Center, Londër. Pjesëmarrja kishte si objektiv forcimin e kapaciteteve institucionale nëpërmjet shkëmbimit të praktikave më të mira ndërkombëtare dhe vendosjes së kontakteve me aktorë të rëndësishëm të industrisë së cannabis-it mjekësor dhe rregullatorëve evropianë.

Qëllimi i konferencës ishte krijimi i një platforme për bashkëpunim dhe dialog mbi të ardhmen e tregut të cannabis-it mjekësor në Evropë. Në qendër të diskutimeve ishin sfidat rregullatore, fragmentimi ligjor brenda Bashkimit Evropian, nevoja për harmonizim e qasjeve kombëtare, përfshirja e të dhënave klinike në vendimmarrje, si dhe roli i teknologjive të reja përfshirë inteligjencën artificiale dhe blockchain  në rritjen e sigurisë dhe gjurmueshmërisë së produkteve.

Gjatë dy ditëve të konferencës, u prezantuan përvojat dhe modelet rregullatore të vendeve si Gjermania, Franca, Mbretëria e Bashkuar dhe Zvicra, me fokus në politikat publike, proceset e certifikimit sipas standardeve EU-GMP, trajnimin e profesionistëve të shëndetit dhe zhvillimin e ekosistemeve të qëndrueshme për cannabis-in mjekësor. Vëmendje e veçantë iu kushtua integrimit të teknologjive inovative në mbështetje të një tregu transparent dhe të sigurt.