Në datën 9 qershor 2025, një përfaqësues i Agjencisë Kombëtare të Kontrollit të Cannabis-it (AKKC) zhvilloi një vizitë studimore në Laboratorin Shtetëror të Kolorados për Shëndetin Publik, në Denver, SHBA.

Gjatë vizitës, përfaqësuesit e AKKC-së patën mundësinë të njihen nga afër me ciklin e plotë të punës laboratorike, duke përfshirë teknikat më të përparuara për analizat mikrobiologjike të bimës së cannabis-it. Ekspertët e laboratorit prezantuan proceset e përdorura për përgatitjen e mostrave, zbulimin e kontaminimeve përmes metodave molekulare dhe biologjike, si dhe interpretimin e rezultateve të analizave. Vëmendje e veçantë iu kushtua mënyrës se si këto analiza raportohen dhe si sigurohet gjurmueshmëria dhe cilësia në çdo hap të procesit.

Stafi i AKKC-së u përfshi aktivisht në sesione diskutimi dhe vëzhgimi, ku u trajtuan edhe çështje që lidhen me garantimin e cilësisë, kalibrimin e pajisjeve dhe sfidat që hasen në harmonizimin e metodave të punës midis laboratorëve publikë dhe privatë. Gjatë këtyre sesioneve u theksua rëndësia e standardizimit të protokolleve në përputhje me kërkesat ISO për testimin e produkteve të cannabis-it.

Kjo vizitë përbën një hap të rëndësishëm drejt ndërtimit të kapaciteteve teknike brenda AKKC-së dhe sjell një përvojë të drejtpërdrejtë në praktikën laboratorike që do të shërbejë si bazë për zhvillimin e një sistemi të besueshëm dhe transparent testimi publik në Shqipëri. Përafrimi me praktikat ndërkombëtare nuk është vetëm një domosdoshmëri rregullatore, por edhe një garanci për sigurinë dhe cilësinë e produkteve.