Agjencia Kombëtare e Kontrollit të Cannabis-it (AKKC) dhe Komisioni i Licencimit, zhvilluan më datë 13 shtator 2024, një takim online të suksesshëm me përfaqësues të institucioneve homologe të Maqedonisë së Veriut, përfshirë Agjencinë e Barnave dhe Pajisjeve Mjekësore (MALMED), Ministrinë e Shëndetësisë, Institutin e Shëndetit Publik dhe ekspertë të industrisë së cannabis-it të këtij vendi.
Takimi u përqendrua në një shkëmbim të hapur dhe frytdhënës mbi përvojat dhe sfidat me të cilat është përballur Maqedonia e Veriut në kontrollin dhe mbikëqyrjen e prodhimit, përpunimit dhe kultivimit të cannabis-it për qëllime mjekësore dhe industriale. Diskutimet përfshinë gjithashtu kuadrin ligjor dhe rregullator të aplikuar nga ky vend, duke vënë theksin te zbatimi i standardeve më të mira ndërkombëtare, si dhe praktikat për përmirësimin e cilësisë dhe sigurisë në të gjitha fazat e prodhimit të cannabis-it mjekësor dhe industrial.
Në përfundim të takimit, u theksua rëndësia e bashkëpunimit rajonal si një faktor kyç për ndarjen e praktikave më të mira dhe krijimin e një ambienti konkurrues dhe tërheqës për zhvillimin e kësaj industrie në Shqipëri dhe rajon.